L’entschatta digl onn 2024 ha la Surselva Romontscha (SR) lantschau sia emprema concurrenza da projects cun la finamira da realisar in project creativ en favur da lungatg e cultura romontscha. Ei ha fatg grond plascher che biaras e biars han participau cun projects zun differents – da cudischs sur films tochen musica e podcasts. Entschatta zercladur ha la suprastonza dalla SR discutau tuttas annunzias e selegra da saver communicar la victura dalla concurrenza – Riccarda Camenisch.
Riccarda Camenisch ha perschuadiu cun siu project da crear in cudisch cun canzuns romontschas per affons. Ella scriva e cumpona dapi onns talas canzuns per sia lavur sco persuna d’instrucziun en ina dallas scolettas a Laax. Perquei dispona Riccarda Camenisch gia d’in repertori da canzuns tematicas davart praulas, figuras fabulusas, fiasta ed usits. Il cudisch duess cuntener illustraziuns adattadas e vegnir accumpignaus dad audios. Nus essan perschuadi da saver realisar ensemen cun Riccarda Camenisch in bi product che maunca aunc en Surselva e selegrein da collaborar cun ella.
Nus engraziein a tuttas e tuts che han annunziau lur ideas e sperein ch’era lur projects sappien vegnir realisai sin ina ni l’autra via.
Surselva Romontscha, ils 28 da zercladur
Toni Vinzens