Il cantautur romontsch Pascal Gamboni va sin turnea el Grischun ed ordeifer. Igl ei diesch concerts tut specials che han liug dil fenadur tochen november 2021. Ils concerts ein en loghens tut apartis. Surtut en loghens sco luvratoris ed ateliers. Quei perquei che Pascal capescha sia lavur sco artisanadi – lavur da maun.
L’idea ei naschida cun la creaziun d’in cudisch. Quei niev cudisch da canzuns cuntegn varga trenta canzuns romontschas da Gamboni, dessegns ed anecdotas sco era translaziuns per tudestg ed engles.
Il cudisch vegn all’entschatta dils concerts presentaus d’in amitg da Pascal. Igl ei Linus Fetz, editur, che vul far cun la publicaziun dil cudisch da canzuns in schenghetg a Pascal, perquei che quel hagi da l’autra vart fatg in schenghetg ad el cun sia musica. Plinavon mondi ei per la derasaziun dalla lavur artistica e litterara da Pascal Gamboni, manegia Fetz, igl iniziant dil cudisch.
Ed aschia va ei bein a prau ch’els dus van cun ghitara e cudisch sin quella turnea, ch’ei vegnida sviluppada avon la pandemia da corona.
