La revesta Annalas po ins gia leger online; ed en in onn duein era il Glogn ed igl Ischi esser accessibels gratuitamain a mintgin egl’internet. Quei sut l’adressa: www.e-periodica.ch
Quels calenders e quellas revestas eran logens per far debattas identitaras, debattas linguisticas e debattas litteraras, mo era per publicar artechels historics, sur da nos usits e nossas tradiziuns sco era per ex. necrologs. Sche nus encurin oz informaziuns biograficas, anfl’ins quellas savens egl Ischi ni egl Glogn, di Rico Valär, professer a l’universitad da Turitg.
Il Glogn ei vegnius fundaus il 1927 da Guglielm Gadola ed Antoni Schmid sco «calender dil pievel» ed «annalas per historia, litteratura e cultura romontscha».
Guglielm Gadola ei staus il redactur dal Glogn dapi 1929 tochen 1953.
Perquei ch’il Glogn vegneva stampaus tier Maggi a Glion ha in descendent da la famiglia editura, Dominik Dosch, stuiu dar ils dretgs per metter online quella revesta. Las historias enconuschentas da Guglielm Gadola ein denter auter: Paul Luziet, Brulf ni Ina fiera a Ligiaun.
Igl Ischi ei igl organ da la Romania (dapi 2006 Surselva Romontscha). Quella ei vegnida fundada il 1896 da Caspar Decurtins. La finamira era ed ei da tgirar e promover il lungatg e la cultura romontscha sursilvana. Ils dretgs da metter el online ha la Surselva Romontscha stuiu dar.
Quei project digital fa l’universitad da Turitg en collavuraziun cun la Biblioteca naziunala ch’ei responsabla per la part administrativa e finanziala e cun la Biblioteca da la Scola politecnica federala a Turitg ch’elavura las datas.
Fontauna originala: https://www.rtr.ch/novitads/grischun/surselva/revistas-rumantschas-glogn-ed-ischi-online
Fotografia: www.rtr.ch