Venderdis, ils 14 da fevrer 2025, ei la radunonza generala dalla Surselva Romontscha stada a Sagogn cun participaziun da rodund 40 persunas (includiu la suprastonza). Il suandont ha la radunonza decidiu:
- Reelecziun ed elecziun dalla suprastonza per treis onns: Toni Vinzens (president) / Rita Bearth / Nadja Huonder / Linus Livers / Muriel Degonda (nova)
- Approbau la nova gliesta da delegadas e delegai per la radunonza dalla Lia Rumantscha
La suprastonza e Riccarda Camenisch han silsuenter presentau il project “Camillo”, in cudisch da canzuns per affons cun audios. Riccarda Camenisch ha scret 14 canzuns ed ina historia che colligia quellas. Plinavon fa ella las illustraziuns. La registraziun dils audios fa Manfred Zazzi dil studio Aquarium/571.
La radunonza generala ei vegnida serrada cun in engraziament a Flurina Cantieni che ha bandunau la suprastonza dalla Surselva Romontscha: Rodund 12 onns ei ella stada suprastonta dalla Surselva Romontscha e damai in gronda constata e petga impurtonta dalla Surselva Romontscha. Cun sia lavur cunscienziusa ed exacta, mo è cun sia gronda savida davart tut ils process e duers dalla suprastonza ha ella facilitau la lavur a tuts.
Igl ei adina stau emperneivel e plascheivel da discutar cun ella: cun sia maniera aviarta e directa ha ella purtau enqual discussiun sil punct necessari. E sco cassiera ha ella giu ina buna ballontscha, sco la situaziun finanziala muossa.
Nus deplorein perquei ch’igl ei stau la davosa radunonza generala da Flurina Cantieni sco suprastonta, mo cuin è ad ella d’haver empau dapli temps per la famiglia e hobis. Suenter tons onns ha ella meritau quei ed in grond engrazia fetg per sia preziusa lavur e siu grond engaschi a favur dalla Surselva Romontscha – engraziel fetg.
Suenter la radunonza ha la gruppa Petta Pagada embelliu la sera cun nova musica da ses emprim album e la Surselva Romontscha ha envidau tuttas e tuts agl aperitiv.
- Artechel dad Augustin Beeli en La Quotidiana da gliendisdis, ils 17 da fevrer 2025
- Foto da Sagogn dad Adrian Michael – CC BY 3.0, https://commons.wikimedia.org/w/index.php?curid=42182012